१२ सप्टेंबर, २००८

एका इ-लग्नाची गोष्ट!! :)

आज असंच ब्लॉगवरचे ड्राफ्ट्स वाचत होते.. बरोब्बर गेल्या वर्षी म्हणजे १३ सप्टेंबरला लिहीलेलं एक पोस्ट वाचलं आणि जाम हसू आलं.. नुकतंच लग्न ठरलं होते.. खूप बोलायचं असायचं त्या काळात.. सगळं लिहून ठेवले होते त्या पोस्ट मधे.. मुळात माझं लग्न म्हणजे एक हॅपनिंग प्रकार होता.. सगळ्यांचच असतं म्हणा.. पण खरंच माय केस वॉज डिफरंट! :) ते पोस्ट तसच्या तसं नाहीच देता येणार.. पण बरेच दिवसांपासून लिहायचंच होतं मला माझ्या लग्नावर.. माझ्या आयुष्यातल्या सगळ्यात मोठ्या आणि रिस्की डिसीजन वर.. (ती रिस्क घेतली हे बरं झालं हे आता कळतंच! ) :)

ह्म्म, कशी सुरवात करावी बरं?? फार डिटेल्स दिले तर जे काही उरले सुरले वाचक आहेत तेही कंटाळतील..! थोडक्यात सांगायचं झालं तर गेल्या वर्षी मी ही पोस्ट लिहीली होती.. त्यानंतर मी थोडीफार लहान मोठी कामं केली.. एकीकडे आईबाबांनीही स्थळं पाहायला सुरवात केली होती.. आणि एप्रिल २३च्या सुमारास बाबांना फोन आला..

ते आले, त्यांनी गप्पा मारल्या, आणि त्यांनी जिंकलं! असं वर्णन मी त्यांचं करीन.. कधी नव्हे ते खूप धमाल आली होती गप्पा मारताना!.. वेव्हलेंथ कशी झटकन जुळते न? जनरली , मुलगा अमेरिका/परदेशात आहे , आणि सद्ध्या मुलाचे आई बाबा भेटायला येणारेत, या केस मधे आपल्याला फार काही काम नसतं हे कळून चुकलं होतं अनुभवाने.. थोडंफार बोला,आणि मुलगा येण्याची वाट पहा,नाहीतर विसरा असा तो कारभार..! इथे तर मुलगा येण्याचे दूर दूर पर्यंत चान्सेस दिसत नव्हते.. ! तरीही मी खूप बोलले.. त्यांनी मला बोलते केलं.. एकंदरीत पॉझिटीव्ह वाटत होतं सगळं.. पहील्याच भेटीमधे पत्रिका वगैरे झकास जुळतीय , आपल्याही मस्त गप्पा झाल्यात.. आता या दोघांना बोलून बघूदे कसं वाटतंय ही स्टेप आली देखील!! जनरली पत्रिका हे मस्त निमित्त असतं ना, नाही म्हणण्याचं! मग असं कसं.. मनानी परत उचल खाल्ली.. हे फारच पॉझीटीव्ह होणार असं वाटत चाललंय बरका.. लगेच दुसर्‍या मनाने गप्प बसवलं!.. :)

३-४ दिवसांनी मुलाशी(निनाद नाव त्याचं.. मुलगा मुलगा काय ते सारखं!) ..ह्म्म तर निनादशी बोलणार होते रात्री.. चॅट, वेबकॅम वगैरे सगळं सज्ज ठेवलं.. तोपर्यंत आपण त्याचा चेहरा विसरून गेलोय हाही साक्षात्कार झाला.. आता परत त्याला रिसेंट फोटो मागणं आलं.. पण बोलताना त्याचा भलताच इफेक्ट झाला.. ! :D तिकडे निनाद, आई बाबांच्या रिऍक्शन्स ऐकून बराच पॉझिटीव्ह विचार करत बसला होता.. माहीत नाही कसं काय, पण बोलायच्याही आधीपासून त्याचा डिसीजन झाला होता ऑलमोस्ट! ( लव्ह ऍट फर्स्ट साईट म्हणतात ते हेच का? :D )
असो.. तर त्याच्या डोक्यात इतका पुढचा विचार आणि अस्मादीक त्याला म्हणतायत, तुझा फोटो दे रे, चेहराच आठवत नाहीए !! :)))) बिचारा थोडा जमिनीवरच आला.. बोलणं एकंदरीत फनीच झालं आमचं.. माझे अती काळजीयुक्त प्रश्न व त्याचे अती एक्सायटमेंटची उत्तरं असा सगळा प्रकार ! मला त्याचं उत्तर कळलंच.. पण त्याला माझ्याकडून काहीच ठाम हो न आल्याने तो ही कन्फ्युज झाला बिचारा.. हो हो हो चं एकदम ह्म्म बघु, ठरवूया झालं.. :) नशीब आईबाबांना त्याने ’हो’च सांगितलं.. बघू,ठरवू सांगितलं असतं तर आमचं लग्नच झालं नसतं! :)


पुढे सगळंच वेगवान गतीने घडलं!! १ मे ला मी माझ्या भावी सासरी जाऊन आले.. घर बिर प्रचंड आवडलं होतं.. त्याचे आई बाबा एकदम पसंत.. निनादही, ह्म्म ते जाऊदे.. :) सुरवातीची अती काळजीयुक्त मी जाऊन निनादवर-अती-फिदा एक्सायटेड मी होऊन बसले होते! :) त्यामुळे तो ही काही प्रश्न नाही.. मग उरलं काय? अर्रे हो की.. निनादला भेटले कुठे होते मी अजुन ?? सगळं फोन,याहू,वेबकॅमवरच आहे अजुन ! ओह नो.. न भेटता कसं लग्नाला हो म्हणायचं बाबा? त्याला तर अजिबातच जमणार नव्हतं यायला.. जस्ट येऊन गेलेला तो इथे.. मग त्यातल्या त्यात एक उपाय काढला.. माझा सख्ख्याभावाने व वहीनीने भेटायचं त्याला.. त्यातल्या त्यात एक आधार.. निनाद नावाचा मुलगा लॉस एंजिलीसला खरंच अस्तित्वात आहे बरका हा आधार! :)

यथावकाश म्हणजे साधारण ५ मे ला भेटले सगळे.. सगळे प्रेमातच याच्या! :) कुणी काही खोड काढेचना.. सगळं चांगलं.. मग कशाला थांबा? लिटरली आता या मुलात,घरचे वगैरे नाव ठेवण्यासारखं काही नाहीए, नवरा म्हणजे अजुन काय नक्की पाहीजे असते, अशा विचारांनी आमचं लग्न ठरलं! हो, एकमेकांना प्रत्यक्ष न भेटता! :)

आहे की नाही डिफरंट केस..? :)

त्याच दिवशी लग्नाचा मुहुर्त,कार्यालय इत्यादी बाबी संपवून सगळ्या गोष्टी फिक्स झाल्या.. १९ डिसेंबरचा मुहुर्त..!
म्हणजे, लग्न ठरल्यापासून ८.५ महीन्यांचा कालावधी !! :O पुढच्या दहा दिवसात, एंगेजमेंट म्हणा किंवा लग्नाची अधिकृत घोषणा म्हणा असा घरगुती सोहळा पार पडला.. !

त्यानंतर केवळ गप्पा.. ! शिवाजीमहाराजांचा एक जोक आहे नं.. राजे निघाले घोड्यावर बसून.. असं पुस्तकाच्या पहील्या पानावर.. वर शेवटपर्यंत तगडक-तगडक असा घोड्याचा आवाज.. तसं आहे.. पुढचे आठ महीने केवळ, याहू,फोन,हेडफोन्स,हीही-हाहा आणि गप्पा इतकंच येईल.. !

१० डिसेंबरला निनादचं फायनली भारतात आगमन झाले.. माझ्या होणार्‍या नवर्‍याला मी प्रथम १० डिसेंबरला पाहीले.. :) तोपर्यंत तो इतका ओळखीचा झाला होता की खरंच आम्हाला काहीही वेगळं वाटलं नाही.. प्रथम भेटतोय याचा ऑकवर्डनेस केवळ १० मिनिटे टिकला.. नंतर आमच्या गप्पा परत सुरू !
१९ डिसेंबरला लग्न लागलं.. २१ ला व्हीजा.. व २८ ची फ्लाईट इत्यादी स्थित्यंतरं झाली!
व २९ डिसेंबरला आम्ही लॉस एंजलीस मधे अवतीर्ण झालो..

_________________________________________________________________

या १९ सप्टेंबरला आमच्या लग्नाला ९ महीने पूर्ण होतील.. ऍंड वी आर एन्जॉयींग इच अन एव्हरी मोमेंट ऑफ धीस जर्नी टुगेदर.. ! ..या सगळ्यावर ’टच वुड’ सुद्धा म्हणायची गरज नाही इतकी खात्री आणि विश्वास आहे एकमेकांवर..

सो... असा एकंदरीत हा प्रवास झाला.. दोन वेगळ्या ठीकाणांवरचे दोन वेडे एका ठीकाणी भेटले.. खरंच! मनासारखा जीवनसाथी मिळणं किती मोठी गोष्ट आहे.. सहजासहजी नाही मिळत अशी.. आईबाबा,बहीण भाऊ यांच्या मतांवर, जजमेंटवर विश्वास ठेऊन असा निर्णय घेतला आम्ही.. ह्म्म, मनाला खरंच भावला नसता तर नसता घेतला हे ही खरं.. पण तरीही त्यांच्यावर विश्वास टाकला.. आणि त्यांचा विश्वास सार्थ ठरला.. आम्हाला खरंच खूप लकी वाटतो आम्ही.. आमचं नशीब चांगलं म्हणून आम्हाला असे चांगले आई बाबा, भाऊ बहीण लाभले.. की ज्यांच्यावर विश्वास टाकून आम्ही आमचा आयुष्याचा इतका मोठा रिस्की डिसीजन घेतला.. गॅम्बल खेळला.. पण व्यवस्थित जिंकलो.. त्यांचा विश्वास सार्थ ठरेल असा प्रयत्न करतो..
अगदीच पर्फेक्ट नको, एखादा तीट लावावा म्हणून मुद्दाम भांडतो.. :)

जेव्हा माझ्या आसपास मी उदाहरणं पाहते की पटकन लोकांना मनासारखा जोडीदार नाही सापडत.. कधी फार अवास्तव अपेक्षा असतात,कधी मोठी लोकं समजुतदार नसतात,तर कधी मुलं.. कधी अती इगो असतो.. तर कधी निर्णय घ्यायची क्षमताच नसते.. एक ना हजार उदाहरणं!
या सगळ्या पार्श्वभूमीवर खरंच माझ्या डोक्यात असा विचार येतो, की हल्ली सगळं कॉम्प्लिकेटेड होत चाललंय का? नाहीत्या गोष्टीना अती महत्व मिळतय का.. किंवा महत्वाच्या गोष्टींना दुय्यम महत्व ? आपल्या आई बाबांचं,मोठ्या माणसांचं ऐकूनसुद्धा चांगलं होऊ शकतं आयुष्याचं, असं वाटणं कमी झालंय का?? की त्यांच मत विचारात घेतलं, म्हणजे आपली निर्णयक्षमता कमी पडली असं तर काही होत नाही(स्वानुभवावरून!) .. मग अशी उदाहरणं का??
Signature2

९ सप्टेंबर, २००८

आवडलेले काही - कवितांचा खोखो..

खूप गडबडीत असल्याने खो ला उत्तर द्यायला उशीरच झाला खरा..
संवेदने खो चालू केल्याबद्द्ल आणि राजने मला खो दिल्याबद्द्ल धन्यवाद!

सगळ्यांनीच उत्तमोत्तम कवीता लिहील्या आहेत. त्यामुळे काय लिहावं हा प्रश्नच होता.. कारण मी कवीतांमधे खूप रमणारी मुलगी नाहीए. आवडत नाहीत असं नाही, परंतू कवीता समजून घेऊन वाचण्याचा पेशन्स नाहीए माझ्यात.. त्यामुळे फार कविता वाचल्याही नाहीत,ज्या वाचल्या त्या सगळ्याच लक्षात नाहीत आता...

असो.. तर मी इथे १ कवीता देणार आहे माझ्या आईची.. माझी आई उत्तम कविता करते,वेळ-प्रसंगानुसार, समयोचित कवीता करणं हा आईचा हातखंडा प्रकार आहे..
या कविता जगाच्या दृष्टीने साध्याच असतील, वृत्तं,यमक,आणि अजुन काय काय सांभाळलं गेलं असेलच असं नाही. परंतू माझ्या दृष्टीने या कवीता फार मोलाच्या आहेत..

१) "सामना"

( ही कवीता, आईने ,तिचे वडील हॉस्पिटलमधे मृत्युशी झुंझत असताना लिहीली आहे.. माझे आजोबा, एक उत्तम शिक्षक होते, क्रिकेटचे प्रचंड वेड.. रणजी सामन्यांमधे आजोबांनी अंपायरींग देखील केले होते.. म्हणून ही कवीता "सामना"! इतकी आतून आली आहे ती, की ही कविता वाचताना मला हमखास माझे आजोबा आठवतात, त्यांना हॉस्पिटलमधे ठेवले होते ते दिवस.. सॅड आहे, ’आवडती’ कविता नाही म्हणवत, पण तरी माझ्यासाठी मोलाची आहे म्हणून इथे लिहीते..)

आयुष्याच्या अंगणात आज एक सामना सुरू आहे
शिवाशिवीचा खेळ अगदी रंगात आला आहे
शरीर आणि आत्म्याच्या ह्या डावात,
आत्मा बाहेर येण्यासाठी तडफडतोय,
तर शरीर त्याला कोंडून ठेवण्यासाठी धडपडतेय.
आजतरी शरीराची धडपड कारणी लागली आहे,
एक सामना आज अगदी रंगात आला आहे..
कबड्डीच्या या सामन्यात -
आत्मा पार्टी सोडून प्रतिस्पर्ध्याला,
आऊट करू पाहतो आहे
पण दम गेल्यावर मात्र
स्वारी परत पार्टीत येऊन बसली आहे.
आयुष्याची दोरी अजुन बळकट आहे
आम्ही सारे प्रेक्षक शरीराच्या बाजूने,
चिअरअप, किप ईट अप म्हणत बसलो आहोत ...
टगऑफवॉरच्या या खेळात शरीराचा विजय झाला आहे..
आत्मा बिचारा गुपचुप निपचित होऊन पडला आहे..
अंपायरच्या भुमिकेत देव सतत उभा आहे..
हात वर करावा की नाही
याचा अजुन निर्णाय होत नाहीए..
कोणाच्याच अपीलला तो दाद देत नाही,
तशी पार्सलिटी त्याला मुळीच खपत नाही..!
पण असे अनिर्णीत सामने किती दिवस चालणार,
एक ना एक दिवस आत्मा मुक्त होणार..
हे सगळं माहीत असूनसुद्धा,
आसवांची तळी अजुन आटत नाहीत..
पायांची लटलट अजुन थांबत नाही,
मायेचा पाश अजुन सुटत नाही
विचारांनी सुद्धा मन थरथरू लागतंय,
मृत्युला या जगातून तडीपार करावसं वाटतंय़!!


२) ह्म्म.. दुसरी कविता संदीप खरेची.. खूप साधं ,सरळ, सोपं लिहीतो तो.. मला असंच लेखन आवडतं, गद्य व पद्यही.. त्यामुळे दुसर्‍या कवितेचा मान त्याला! तशा मला त्याच्या सगळ्याच कविता आवडतात.. एक सिलेक्ट करायची म्हणून ही..

कितीक हळवे, कितीक सुंदर
किती शहाणे आपुले अंतर
त्याच जागी त्या येऊन जाशी
माझ्यासाठी... माझ्यानंतर

अवचित कधी सामोरे यावे
अन श्वासांनी थांबुन जावे
परस्परांना त्रास तरीही-
.. परस्परांविण ना गत्यंतर

मला पाहुनी दडते, लपते
आणिक तरीही इतुके जपते
वाटेवरच्या फुलांस माझा
लावून जाते हळूच अत्तर

भेट जरी ना या जन्मातून
ओळख झाली इतुकी आतून
प्रश्न मला जो पडला नाही
त्याचेही तुज सुचते उत्तर

मला सापडे तुझे 'तुझेपण'
तुझ्याबरोबर माझे 'मीपण'
तुला तोलुनी धरतो मी अन
तू ही मजला सावर सावर

मेघ कधी हे भरून येता
अबोल आतून घुस्मट होता
झरते तिकडे पाणी टपटप
अन इकडे ही शाई झरझर
...

माझा खो : किशोर आणि पिडाकाका(मनतरंग)