९ जुलै, २०१३

माझी भटकंती - योसेमिटी (Yosemite National Park, California)

मी अजुन या स्वर्गीय जागेतून बाहेर येत नाहीये. कोणाला सांगू व किती फोटो (कुठे कुठे) शेअर करू असं झालंय! :)

४ जुलैचा लाँग विकेंड जवळ येऊ लागला तसे वेगवेगळे बेत शिजू लागले. फिरून फिरून गाडी सारखी योसेमिटीलाच येऊन थांबत होती. आतापर्यंत किमान ३ वेळा प्लॅन ठरून हॉटेल बुकींग न मिळाल्याने फसला होता. यावेळेसही एकदा आधीचे बुकिंग कॅन्सल होऊन दुसरीकडे मिळाले व एकदाचे आम्ही योसेमिटीला जाणार हे निश्चित झाले. 
आम्ही ३ ला संध्याकाळीच लॉस एंजिलीसवरून निघालो बे एरियात जायला. तिथे माझा भाऊ राहतो व सध्या तिकडे आई बाबा आहेत. त्यामुळे तिकडूनच सगळे एकत्र योसेमिटीला जाणार होतो. ३जुलैला संध्याकाळी पावणे सातला निघालो खरं  पण ८ पर्यंत घरापासून ५ मैलसुद्धा गेलो नव्हतो! इतकी गर्दी!! एकदाचे फ्रीवेला लागलो व सुरू झाला लांबलचक प्रवास! बरोबर मुलं असली की किमान डायपर ब्रेक्स धरावेच लागतात. आम्ही पोचलो भावाकडे पहाटे साडेतीनला! :| माय गॉड! पुढचे दोन दिवस मी झोपेतच होते! :) 
४ तारखेला Milpitas मधील Dosa Bawarchi ला गेलो. काय अफाट सुंदर जेवण मिळाले तिथे. एकतर इतकं चकाचक व मोठं इंडीयन रेस्टॉरंट पाहूनच बरं वाटलं! त्यात तो भला मोठा लंच बफे! प्रचंड जेवलो.. डोशाबरोबर चिकन टिक्का मसाला काय भारी लागतो? अ-मे-झिं-ग!! 
नंतर मग जेवण जिरवायला जरा आयकियामध्ये फिरून आलो! संध्याकाळी आईच्या हातचे बटाटेवडे! yumm !! खूपच धमाल आली. किती दिवसांनी असं रिलॅक्स्ड वाटत होते. 
५ तारखेला नेहेमीची पटेल ब्रदर्सकडे चक्कर मारून आलो. अजुन ही लोकं लॉस एंजलिसमध्ये का येत नाहीत देव जाणे. आर्टेशियात आहे बहुधा दुकान. पण बे एरियाचे पटेल खरंच छान आहे. केप्रची भाजणी, मसाले, सकसची पीठं घेतली साठवणीची. आता ३-४ महिने तरी हे पुरवून पुरवून वापरायचे! :)
मग milpitasच्या great mall ला चक्कर. मस्त मनासारखी शॉपिंग केली व संध्याकाळी On The Borderमध्ये मायबोलीचा ग्रुप भेटला. भरपूर गप्पाटप्पा मारून आलो. मायबोलीची गटगं नेहमीच रिफ्रेश करून सोडतात! :) 

६जुलैला सकाळी ८ ला घर सोडायचा प्लॅन होता. त्याचे ९ वाजले पण नॉट बॅड. भरपूर प्रवास (४-५ तास) करत एकदाचे योसेमिटीत आलो. आणि मग सुरू झाला स्वर्गीय प्रदेश. माझ्यामते आता मी बडबड बंद करावी, व फोटोंनाच बोलू द्यावे. प्रत्येकाला विनंती : जमल्यास नक्की जाऊन या ठिकाणी! you will thank me later! :) 

 

१ जुलै, २०१३

बटर चिकन

मागच्या आठवड्यात बटर चिकन केले होते. हल्ली महिन्यातून दोनदातरी होतेच ते. इथे Los Angeles, मध्ये आल्यापासून आम्हाला विविध रेस्टॉरंट्सच्या होम डिलिव्हरीची फार सवय लागली होती! पण एकंदरीत सर्व इंडीयन रेस्टॉरंट्सप्रमाणे कुठेही कन्सिस्टन्सी नाही हो! मागच्या वेळेस अमुक मधीन ढमुक चांगले होते म्हणावे तर पुढच्या वेळेस नक्की घोळ होणार! शेवटी स्वतः करून , एक फिक्स रेसिपी शोधणे आले. हल्ली तेच बरे वाटते. मनापासून खाल्लेही जाते!  :) 

माझ्या ब्लॉगवर २००८ मध्ये मी ही पोस्ट लिहीली होती. खरं म्हणजे ती रेस्पी म्हणावी तर बटर चिकनची नाहीये! [पण आम्ही हीच रेसीपी वापरून केलेली तेव्हाची डिश मात्र बटर चिकनसारखीच लागत होती! :))] पण ते काही खरे नव्हे. चांगली ऑथेंटीक रेस्पी परत लिहीलीच पाहीजे मला. 
ही घ्या ट्राईड & टेस्टेड बटर चिकनची पाककृती! :) 


लागणारा वेळ: 
४० मिनिटे
लागणारे जिन्नस: 
५०० ते ७०० ग्रॅम बोनलेस, स्किनलेस चिकन ब्रेस्ट
मोठा चमचा दही
अर्धा चमचा लिंबाचा रस
हळद
२ मोठे कांदे
२ टोमॅटो
६-७ मोठ्या लसूण पाकळ्या
बटर (भरपूर!)
८फ्लु औंझ हेवी व्हिपिंग क्रीमचा छोटा पॅक मिळतो. तो अर्धा तरी लागेल. स्मित
५-७ बदाम व ५-६ काजू (गरम पाण्यात अर्धा तास तरी भिजवतठेवावेत)
२-३ टीस्पून लाल तिखट
मीठ चवीप्रमाणे
एक चमचा साखर
मसाल्यासाठी:
२-३ तमालपत्रं
६-७ मिरीदाणे
५-६ लवंग
दालचिनी पूड चिमुटभर
वेलदोडा पूड चिमुटभर
एक लाल सुकी मिरची
बदामाची पूड ३-४ मोठे चमचे
हे सर्व भाजून मग वाटून घ्यावे.
क्रमवार पाककृती: 
चिकन स्वच्छ धुऊन, त्याचे बाईट साईझ तुकडे करून त्यावर लिंबाचा रस, हळद, तिखट, मीठ व दही घालून मुरवायला ठेवावे. जेव्हढा जास्त काळ तेव्हढं चांगलंच! (मी कमीत कमी ३०-४० मिनिटं ठेऊन देखील केलेले आहे. पण ४-५ तास ठेवले तर मस्तच!)
पॅनमध्ये तेलात(किंवा बटरमध्ये) लसूण परतायला घ्यावा. तो जरा सोनेरी झाला की त्यात कांदा घालून चांगला भरपूर, कॅरॅमलाईज्ड होईपर्यंत परतावा.
मग त्यात टोमॅटो घालून तेल सुटेपर्यंत मिश्रण परतवून/शिजवून घ्यावे.
जरा गार झाले की वाटून घ्यावे.
ज्याच्यात चिकन बनवणार आहात त्यात (मनसोक्त) बटर तापवून त्यात मॅरिनेट केलेले चिकन घालावे. थोडंसं हाय फ्लेमवर हलके शिजवावे.. चिकन पांढरटसर दिसू लागले की कांदा-लसूण-टोमॅटोची प्युरी घालावी.
जरावेळाने वाटलेला मसाला घालावा.
२-३ चमचे तिखट, मीठ घालावे. कसूरी मेथी चुरून घालावी.
बदाम-काजूची पेस्ट मिसळवावी. हवा असल्यास ऑरेंज फुड कलरही घालता येईल.
हेवी व्हिपिंग क्रीम अ‍ॅड करावे,
मग झाकण ठेऊन चिकन शिजू द्यावे.
चिकन शिजल्यानंतर चव पाहावी. सर्व मसाल्यांची छान चव आली असेल परंतू गोडूस चव आली नसेल तर थोडीशी साखर घालावी. काजूची पेस्टही वाढवता येईल. वरून एक चमचा मेल्टेड बटर घालावे.
झाले, बटर चिकन तयार!! स्मित
वाढणी/प्रमाण: 
३-४ जणांसाठी.